Анхны хөрс хуулалт хийсэн экскаваторын оператор Н.Цогт

Анхны хөрс хуулалт хийсэн экскаваторын оператор Н.Цогт

"Эрдэнэс-Тавантолгой” ХК-ийн анхны гэх тодотголын эзэн Н.Цогтыг "Эрдэнэсчүүд” булангийн эхний зочноороо урилаа. Түүнд энэхүү эрхэм хүндтэй тодотголыг зүүсэн нь учиртай. Тэрээр, Монгол Улсын томоохон бүтээн байгуулалтыг эхлүүлэхэд гар бие оролцсон манай ууган ажилчдын нэг. Тодруулбал, Н.Цогт 2010 оны 8-р сарын 10-ны өдөр уурхайн анхны экскавоторыг аваачиж, бүтээн байгуулалтын техник "цуглуулах” ажлыг гардан хариуцсан төдийгүй хамгийн анхны хөрс хуулалтыг хийжээ. Түүнийг 2010 оны 8-р сарын 17-ны өдөр анх уурхайн хөрсийг хуулах үеэр Төрийн өмчийн хорооны дарга Д.Сугар "Монгол Улс үүцээ задаллаа” хэмээн билэгшээж байсан түүхтэй.

Анхны хөрс хуулалт хийсэн экскаваторын оператор Н.Цогт

Завхан аймгийн Алдархаан сумын уугуул хүү Н.Цогт цэргийн албаа улсын нийслэл Улаанбаатар хотод хааж, ажлын гараагаа 2000 оноос уул, уурхайн салбараас эхлүүлжээ. Энэ салбарт хүчин зүтгэж эхэлсэн Н.Цогт "Эрдэнэс-Тавантолгой” ХК-ийг үүсгэн байгуулахад анхны шан татагчдын нэг болсноор өдгөө компаниараа нэрээ, гэрээ хийн ажиллаж хөдөлмөрлөж байна. Түүний 7-35 дугаартай анхны автосамосвал хүлээн авч, шинэхэн сургууль төгссөн Уулын мастер С.Баярхүүгээс зааварчилгаа авч, ажлаа эхлүүлж байсан түүх саяхан мэт.

Таана, хөмүүл үнэртэж, талаар мал бэлчсэн Цанхийн хөндийд бүтээн байгуулалтын ажлаа эхлүүлсэн Н.Цогтод Өмнөговь аймгийн Цогтцэций сум хэдийнэ төрсөн нутаг нь болжээ. Тэр ямагт Цэций хайрхандаа сүслэн залбирч явдгаа хэлсэн юм.

Нар эгц доороос мандсан говийн өглөө сайхан. Өглөөний нар мандахад өндөр хөрсний овоолго, аварга техникүүд нааш, цааш сүлжилдэн ажил хөдөлмөр буцалж байгааг харахад бахархмаар. Эх орны бүтээн байгуулалтын ажил өрнөсөн тэр л нутагт Н.Цогт шиг шилдэг ажилчид ар араасаа төрсөөр байгаа билээ.

Н.Цогтын ажил 14, 14 хоногийн ээлжээр явагддаг. Эхнэр, гурван хүүхэд, эх орон, компанийнхаа өмнө хүлээсэн түүний хариуцлага бол эрүүл, аюулгүй, үр бүтээлтэй ажиллах юм. Уурхайн үнэт зүйл бол эрүүл ажилтан. Тиймээс ч тэрээр хамт олондоо, залуу уурхайчиддаа уурхайн дүрэм, журмыг чандлан сахиж, ажилдаа үр бүтээлтэй, аюулгүй ажиллаж, худлаа хэлэхгүй, ажлын цагийг ягштал сайн баримталж ажиллах нь чухал болохыг сургамжилдаг.

Нар мандахтай зэрэгцэн 5:00 цагт босч, өглөөний цайгаа уугаад, уурхай дээр 6:50цагт зааварчилгаа авснаар түүний ажил эхэлнэ. Өглөө 7:00 цагаас орой 19:00 цаг хүртэл ажилдаа улайрсан тэрээр ядрахыг ч анзаардаггүй гэнэ. Ялангуяа шөнийн ээлж анхаарал, сэрэмж илүүтэй шаарддаг тул өдөр нь сайн унтаж амарсан байх хэрэгтэй. Н.Цогтын ажлын байр нь өндрөөрөө 3 давхар байшинтай тэнцэх, 680 тоннын даацтай экскаватор. Тэрээр өдөржин аварга техник дотроо өнждөг ч машинтайгаа нэг цул болж, доголдол саатлыг мэдэрч, дасан зохицсоноо бахдан ярьдаг.

Эрдэнэсчүүдийн ихэнх нь залуучууд. Залуу уурхайчиддаа ажил дээрээ үр бүтээлтэй, аюулгүй ажиллагааг эрхэмлэн ажиллахын зэрэгцээ эргээд ар гэрийнхээ өмнө хүлээх хариуцлагаа ухамсарлан хувийн зохион байгуулалт сайтай байх хэрэгтэй гэж Н.Цогт үздэг.

Ажилтан бүр энэ байгууллагын нэг салаа мөчир учир нэг нэгнээ дэмжин ажилласнаар компани маань илүү өргөжин дэвжиж, улсынхаа хөгжил дэвшилд хувь нэмрээ оруулах хамт олны зорилго улам өөдрөгөөр биелсээр байхыг анхны гэх тодотголтой Н.Цогт уриалж байна.

 

Анхны хөрс хуулалт хийсэн экскаваторын оператор Н.Цогт

Анхны хөрс хуулалт хийсэн экскаваторын оператор Н.Цогт

Анхны хөрс хуулалт хийсэн экскаваторын оператор Н.Цогт

Анхны хөрс хуулалт хийсэн экскаваторын оператор Н.Цогт

Анхны хөрс хуулалт хийсэн экскаваторын оператор Н.Цогт